أنا مشدودة لراجل غير جوزى….
علاقة الرجل بست تانية غير مراته موضوع بيتناقش بشكل كبير، لكن الحتة اللى بنخاف نتكلم عنها هى انجذاب الست لراجل غير جوزها.
فلو حضرتك من الناس اللى بتحب تدفن رأسها فى الرملة وتتجاهل المشكلة بدلًا من فهمها والتعامل معاها فماتكملش قراية من فضلك.
وأنا بتكلم هنا عن الانجذاب العاطفى فقط دون الدخول فى علاقة جسدية، مبدئيًا هنقسم شكل الزيجات اللى ممكن فيها الست تنجذب لرجل تانى:
النوع الاول من الزيجات وهو نادر جداً وده جواز من الاول اصلًا مريب
عشان الست فيه هى الأكثر ندرة بين الستات؛ ودى ست بتنجذب لرجالة طول الوقت، مش راجل معين، هى ماشية تحاول مع أى راجل تقابله، بتلاغى ده وبتشاغل ده أيا كان نوع العلاقة اللى هى فيها، مخطوبة بقى ولا متجوزة بقى ولا أرملة..
ودى مش هنتكلم عنها هنا لأنها بتبان للرجل من الاول خالص وفى بداية تعارفهما، وبتكون محتاجة علاج نفسى مكثف.
النوع التانى:
جواز الست فيه اتجوزت راجل اتغصبت عليه وأيوا احنا كعرب عندنا ده لسه بيحصل لحد انهاردة، وفيه أهل بيمارسوا كل الانواع الاعتداء البدنى والنفسي على البنت عشان تتجوز اللى هما شايفينه مناسب.
النوع ده غالبا بيتجوز فى سن صغير وبيكون مستواه الثقافى و التعليمى بسيط.
ودول قلة منهم بعد الجواز لو طريقة الراجل معاها حنينة ومتفهمة ممكن تحبه، وتمشى الحياة بسلام، لكن الأغلبية اللى بتبقى قفلت خلاص منه لأنها مغصوبة عليه وبتمشى معاه فى الحياة بس عشان ماتنفصلش وترجع لجحيم الأهل.
ودى مع نضجها شوية فى السن وتغير شكل دماغها واحتياجاتها ممكن بكل سهولة تنجذب لأى راجل معدى تحت البلكونة لو بس شاغلها وحاول يلعب على احتياجها.
نيجى بقى للنوع التالت:
وهو الأشيع، وده جواز بتكون فيه ست اتجوزت راجل مختاراه بنفسها أو بتحبه أو موافقة عليه بس وقع من عينها كراجل
وهنا بقى الكارثة لأن الست السوية ومعنى كلمة سوية هنا انها مش النوع الاول، الست بالفطرة مستحيل تنجذب لراجل غير جوزها، لكن ده ممكن يحصل لو اللى كان راجلها وقع من نظرها، يعنى بطلت تشوفه راجلها.
طب ايه اللى يخلى واحدة ست تتجوز حد مختاراه وعايزة تعيش معاه تبطل تشوفه راجل؟
1: بيؤذيها:
بيمد ايده عليها، بيضرب أو بيشتم وبيهين راجل غضبه بيغلبه راجل كسر احساسها بالأمان معاه فبطلت تشوفه راجل أصلا.
2: راجل مدمن:
عبد لأى حاجة؛ مدمن حشيش، مدمن علاقات نسائية مدمن افلام إباحية، المهم إنه عبد الحاجة اللى مش قادر يبطلها واللى بتحرك حياته وبتأثر على قراراته وسير حياته وحياتها معاه.
3: راجل ظل:
يعنى حد تانى بياخدله قرارته، أمه بتقرر هيصيفوا فين، أبوه هو اللى بيقول العيال يدرسوا إيه، أخته هى اللى بتشتريلهم لبس الصيف..المهم أنه مش سيد حياته ولا قراراته وبالتالى الست بتاعته بتشوفه ولا حاجة.
4: الرجل اللى مابيصرفش عليها:
ودول كتير اوى بقى؛ يا اما هو اللى قاعد ف البيت وهى اللى بتشتغل وشايلة كل حاجة، يا إما هو يادوب بيجيب الاكل وبيطلب منها هى تغطى مصاريف نفسها ومصاريف عيالها، احنا هنا مش بنتكلم عن جواز الاتنين بيشتغلوا والاتنين بيساعدوا بعض على عبء الحياة المادى.
لكن بنتكلم عن راجل مش بس بخيل، لأ ده مريض، لأن فى الحقيقة معظمهم بيبقى عنده المقدرة يكفيها وزيادة بس هو بيستخسر فيها أى حاجة مش بس الفلوس لكن كمان الطبطبة واللمسة والكلمة هو أتربى كده وكبر كده.
يا اما هو مش أول جوازة ليها والاتفاق كان كل واحد يشيل شيلته ونتقابل نغطى احتياجات بعض الجسدية بس.. ودى حركة رجالة كتير اوى بتعملها خصوصا مع الست اللى اتجوزت قبل كده لأنه بيبقى متوقع انها هتوافق وترضى بأى حاجة زحتى لو معجبهاش قدام هتخاف تتطلق تانى..
5: الراجل المقموص:
اللى طول حياته بيهجرها ويخاصمها، ويعاقبها طول الوقت، وزى ما فيه ستات بتعاقب جوزها بالحرمان من العلاقة الزوجية، فيه رجالة كتير بتعاقب الست بالخصام والبعد والهجر فى الفراش.
والخصام والهجر دول نوع من أنواع الابتزاز العاطفى اللى بيحسس الست انها مش ست فى عيون جوزها، وبيوصلها رسالة انك مش متشافة ومقصية وتستاهلى العقاب.. وياسلام بقى لو الست دى عندها حرمان عاطفى من الطفولة أصلا كده بقى بتضرب فى مخاوف قديمة عندها.
الست لما بتعيش حالة من الحالات دى ومع ظهور أى اهتمام من رجل تانى على الساحة خاصة بعد الانفتاح الرهيب وزمن السوشيال ميديا،
حتى لو الاهتمام ده رسالة عبر تطبيق الفيس بوك، بتتشد مش للراجل ولا للعلاقة اللي بينهم ده ممكن الموضوع اصلا يفضل مجرد شات، لكن الست هنا بتتشد للاهتمام، لاحساس انى ست، بتتشد لأى نقطة حب أو اهتمام عشان هى عطشانة وجعانة للاحتياج ده.
طب ايه المشكلة؟
المشكلة ان الغالبية العظمى من الرجالة اللى بيقدموا الاهتمام للست دى وهى على ذمة راجل تانى، هما يانصابيين ياعندهم مشاكل نفسية.
ليه بقى؟
عشان أى بنى آدم بينجذب لشخص آخر غير متاح عاطفيًا؛ سواء اللى منجذب ناحيته ده حد متجوز أو على ديانة أخرى أو ايا كان السبب المهم يكون الشخص اللى هو بيسعى ليه وضعه يمنعه من الارتباط..الشخص ده هو بيكون عنده مشاكل نفسية و محتاج مساعدة متخصص.
وغالبا اتشد ليها لانها مش هتطلب منه اى حاجة غير اللى بيقدمه دلوقتى، اللى هما شوية كلام وغزل واهتمام، ولو بكرة الصبح بقت الست دى حرة ومتاحة وطلبت أن العلاقة تنمو، فالرجل ده اول واحد هيديها ضهره ويمشى.
ده غير أنه وجود الست دى اصلًا فى علاقة سواء مؤذية سامة أو علاقة مش بتغطى معظم احتياجاتها النفسية والجسدية بيخليها شخص ضعيف محطوط تحت ضغط احتياجاته الملحة فبيختار غلط.
يعنى فى كل الأحوال الراجل اللى بتتشد ليه ده وهى متجوزة راجل تانى هو اختيار غير مناسب بكل المقاييس
طيب تعمل ايه الست دى؟
عندك اختيار من اتنين مالهمش تالت؛ ياتشتغلى على علاقتك بالراجل اللى انتى متجوزاه بمساعدة مختص، ياتمشى من جوازك بكل شجاعة ورحمة، لأن انتى مش بتحبى التانى انتى بس محووجة ليه، وده معناه أن علاقتك بجوزك بقت على المحك ومحتاجة عملية إنقاذ.
لأن الخيانة مش هى بس العلاقة الجسدية، ده انتى لو مسحتى رسالة قبل ماجوزك يرجع عشان عارفة انها مش مناسبة فدى خيانة.
الجواز عهد قطعتيه على نفسك قدام ربنا وإنتى بتوقعى عقد جوزاك اللى يقتضى انك تصونى الراجل ده فيكى.
انتى كمان لما بتعيشى علاقة فى السر بتخونى نفسك لما بتسمحيلها تشعر بالذنب والدناءة وعدم الاستحقاق عشان العلاقة دى هتفضل توصلك صورة سيئة عن نفسك بأنك ست بتخالف كلام ربها وضميرها.
أكيد القرار صعب لأن احتياجك هو اللى بيحركك..
والاحتياج دايما أبو الاختيارات الغلط وأبو المعافرة فى السكة الخطأ.
طب الراجل اللى حاسس او اكتشف بالفعل أن مراته منجذبة لرجل تانى يعمل ايه؟
رجالة كتير اوى للأسف بعد مابتكتشف ده بتلجأ لفكرة اراقبها أو أحبسها وأخد منها تليفونها، وللأسف ده بيؤثر بالسلب أكتر وبيضر علاقتهم بزوجاتهم دول أكتر، وهو حتى مع مراقبته ليها مش بيرتاح بالعكس، ده بيتوتر ويشك أكتر وتجسسه عليها ده عمره ماهيرجع ثقته ولا طمأنينته أبدًا.
لو انت فى الموقف ده مهم تعرف إن اللى حصل معناه انكو محتاجين انت وزوجتك مساعدة مختص، عشان تعرف تتجاوز الموقف وتبنوا علاقة صحية من اول وجديد، وتسامح وتكمل.
طب لو مش قادر تتجاوز كل ده، مش عارف تكمل، يبقى تنفصل عنها بكل أدب ورحمة من غير اهانات ولا فضائح.
#لايك ومتابعة وشير عشان الكل يستفيد
#يوميات #سحابةحب