مصنفة من اجمل ستات العالم، بتتكلم 5 لغات، هي البرتغالية والإيطالية والإنجليزية والإسبانية والعربية، مبتشربش كحول ولا قهوة، ومبتدخنش، بيتوتية وبتحب قعدة البيت، رسامة شاطرة، وبتعشق الرسم على البيض الني، طولها متوسط، لا طويلة ولا قصيرة 157 سم، ووزنها 50 كيلو، ولما بتوصل 53 كيلو، بتبقى كارثة بالنسبالها.
دي شاكيرا اللي خانها بيكيه .. واللي حاليا بيلعبوا لعبة القط والفار سوا، وبتغني اغنية بتلقح عليه وتقوله سبت الروليكس وخدت الكاسيو، وهو بيقولها مالها الكاسيو دي ضد المياه وبتعيش طول العمر وعيالك يورثوها..
الحقيقة قصة شاكيرا وبيكيه بالنسبالي مثال ان الخيانة ملهاش علاقة بنقص ما، الخيانة ليها علاقة بشخص اللي خان .. سواء راجل او ست .. يعني شاكيرا دي مش بس ناقصلها 2 فولت وتنور .. دي نورت ونورها غطى المكان.. فهي تتخان ليه يعني..
انا ليا وجهة نظر في الموضوع .. ان القصة ليها علاقة بما تملك وبما لا تملك .. لو انت معاك اغلى عربية في العالم.. بعد سنة .. زهوة العربية دي بتروح .. بتحس ان العربية دي عادية .. عكس الشخص اللي راكب تويوتا.. هو بالنسباله عربيتك دي ياه .. ياه بس لو اركبها يوم .. هنا انا مش بقارن العربية بالمرأة .. بتكلم عن فكرة ان الشخص كان فيه حوزته الشيء دا... فبيبدأ يتعامل معاه على انه شيء عادي.
مرة قريت بوست على جروبات السوشيال بروبليم . واحدة بتقول "انا جوزي خاني مع اختي، المصيبة ان اختي دي تؤامي، يعني شبهي، يعني خاين وغبي"، والغريب هنا انها فاهمة ان اللي بيخون بيخون علشان بالضرورة الست اللي بيخون معاها بتبقى احلى .. ممكن يكون بيعمل كدا لانها الطف .. اذكى .. مثقفة اكتر.. دا فيه رجالة عندها فيتش القدم .. يعني ممكن يحب واحدة علشان رجليها حلوة .. بغض النظر عن وشها.. ممكن يحبها علشان شخصيتها قوية .. او معندهاش شخصية .. او زي ياسمين عز.. او يحبها لاي سبب ممكن ميجيش في بالك.
بل في دراسة اتعملت سنة 2006 من جامعة بيرسول في ولاية roshy elardayat.. ان الرجالة بتخون ستاتهم مع ستات اوحش منهم.. كنوع من التغيير وكنوع من محاولة كسر الرتابة.. ودي مش دراسة .. دي جملة قالها احمد المرسي بناءا على ملاحظة شخصية .. بس قلتلك دراسة علشان تقتنع بيها لانك اكيد مش هتقتنع بكلام احمد المرسي..
طيب انت عايز تقول ايه يا سيدي.. عايز اقول لشاكيرا .. ملكيش دعوى بالكاسيو .. علشان دي ساعة جميلة جدا.. فلو ممكن يعني ساعة روليكس هكون شاكر جدا ليكي..
