نسيم الزراع
آلوووه...أيوه
أنا معاكي
أكيد سمعاني من فضلك
دا آخر إتصال بيننا
نسيتي خلاص
دا كان لازم بإنك يوم هتفكري
بإن الفرح مش دايم
وإن الجرح راح ياخد بقايا دموع
ف كفينه
وإن القلب هيواجه مصيره الموت
فمن فضلك دقيقه حداد
في تأبينه
وبعد مراسم التشييع
بلاش تتألمي تاني
ولا عيونك تشيل دمعه
أكيد سامعه
لكنك ليه مبترديش
آهاتك طالعه مجروحه
آلووووه....لساكي سمعاني
ولسه السكه مفتوحه
ولسه القلب بيعاني
بينزف نبضه مدبوحه
خصامك ليه كدا جارح
وليه دايما كلامك صعب
وليه ساعة الخصام دايما
بتتهميني بالأسوه
وعدم الوصل
وقلبي عاش بدون نخوه
وكان دايما قليل الأصل
وإني للهوي خاين
مع إني واضح جدا
وكان باين
وعمري ف يوم ماغشيتك
د انا ف ضلوعي رشيتك
طرح حبك ف وجداني
ف نبض القلب لفيتك
وجريتك ف شرياني
أكيد لساكي سمعاني
ولسه السكه مفتوحة
بقالنا كتيير بنتخاصم
ونبعد أد مانبعد ونتألم
ونرجع تاني تتكلم
وعمرى ف يوم ماقلت انتي
لا بعتي ف يوم
ولا مره ف يوم هونتي
ولا قولتش بإنك كنتي كدابه
ولا حبك ملاني حزن وكآبه
ولا نبضك كما نغمه
في جوف اللحن منسابه
بيسمعها كتير غيري
أنا عشتك وحبك كان جناح طيري
وتفسيري بإني مش جدير بيكي
ولا غيري
ولا ميت قلب يكفيكي
وقلبي اللي اتخدع فيكي
هينساكي..خلاص طيري
وزي ماكبرك قلبي
علي نبضي كمان سيري
وعيشي دنيتك بعدي
آلوووه..لحظه
دي آخر كلمه مابنا
أنا آسف
دا حبك كان حزام ناسف
فدوسي عليه ف تأتيني
آلوووه ... أيوه
قفلتي السكه ومشيتي
علي راحتك لكن عارفه
فطمت القلب من ريحتك
دا لو شايفه
وعاش النبض ف عنيكي
دموع زايفه
