قصر وقلعة صاحبة الجلالة المشهور ب (برج لندن )
مكان تاريخي وجميل جداً وعادي تبقى بتزوره وتقابل شبح ملك من الملوك اللي إتعدموا هناك !!!
إي انت خوفت ، طب تعالى أحكيلك حكاية جديدة من حكايات العنكبوت 🖤
سنة 1066 تم بناء القلعة كجزء من إحتلال النورمان لإنجلترا ، وسنة 1068 أمر ويليام الفاتح ببناء البرج الأبيض اللي أصبح فيما بعد رمز لقهر الأسرة الحاكمة الجديدة لأعدائهم في لندن ، وفي سنة 1100 تم إستخدام القلعة كسجن .
في ناس كتير جداً قالوا إنهم شافوا أشباح في القلعة وحوليها ، وفي ملوك مشهورين إتعدموا هناك زي ( هنري السادس ) و( إدوارد الخامس وشقيقه ) وفي ملكة اسمها ( آن بويل ) تم قطع راسها في البرج سنة 1563 بتهمة الخيانة العظمى ضد الملك ( هنري الخامس ) ودي بقى بتظهر شايلة راسها وماشية عند برجين من أبراج القلعة !!
وكمان شبح الدب ودا حصل في يناير 1816 لما قال أحد الحراس ان شبح دب هاجمه عند دار الجواهر الملكية واللي يأكد إن كلامه صح إنه مات بعد أربع أيام بسبب الخوف !!!
وفي 12 فبراير سنة 1957 الساعة 3:00 صباحاً أحد الحراس سمع صوت خبط فوق مبنى القصر ولما طلع يشوف في إي شاف شبح أبيض وتبين بعد كدا إن اليوم ده ذكرى إعدام الملكة ( الليدي غراي ) بقطع راسها في 12 فبراير 1554 🙂
أكتر المواضيع المرعبة بقى هو شبح الكونتيسة ( ساليسبري ) ودي صدر حكم الإعدام عليها بسبب جرائم لكنها قدرت تهرب وتم ملاحقتها وقتلها بفأس خارج البرج وتبين برائتها بعد كدا .. مشهد قتلها بيتعاد خارج البرج حتى الآن 🚶
وعند مدخل القلعة الرئيسي قال أحد الحراس انه شاف مجموعة من الناس لابسين ملابس قديمة وبيجروا وراهم عربة عليها جثث ناس راسهم مقطوعة ولما قرب عليهم المشهد اختفى !!
إنت زهقت ولا إي يا صديقي القارئ إستنى بس لسه قصتين ..
أولهم هي إن في كنيسة دخل القلعة اسمها ( كنية القديس بطرس ) كان بيتم دفن جثث الناس اللي إتعدموا مكانها ولكن الملكة ( ڤيكتوريا ) أمرت سنة 1876 بإستخراج الجثث ودفنها بشكل لائق والكنيسة دي إتبنت مكانهم ويقال إنها مليئة بالأشباح ، وفي وقتنا الحاضر أفاد ضابط من ضمن الحراس برؤية إمرأة شبه الملكة ( آن بويل ) ماشية وحوليها ناس وكالعادة المشهد إختفى لما قرب منه !!
أما بقى القصة التانية هي قصة الملك ( هنري ) اللي اتقتل عند برج ( ويكفيلد ) على إيد الدوق ( جلوسترويقا ) أنا عارف إنك تجاهلت الإسم بس ما علينا 😁 شبح الملك هنري بيظهر كل يوم بالليل لمدة بضع دقائق مكان ما اتقتل !!
والقصة الآخيرة بقى هي عند مجرى الماء سنة 1960 أصيب أحد الحراس بالهلع لما شاف راجل طويل لابس عباية سوده وماشي جنب مجرى الماء هتقولي واي اللي يخوف ما يمكن راجل عادي هقولك اللي يخوف انه ماشي من غير رأس !!!
لو وصلت لحد هنا والقصة عجبتك متنساش تدخل تتابعني أنا بنشر على صفحتي قصص غريبة من الواقع يارب تعجبكم 🖤
