#Death_bus
العربيه بتاعتي عطلت فجأه علي احدي الطرق السريعه
نزلت أشوف ايه سبب العطل وللاسف معرفتش
طلعت الموبايل من جيبي علشان اتصل بأي صديق يجيلي بعربيته لكن من سوء حظي كمان ان مفيش شبكه
بقيت واقف محتار ومش عارف اتصرف ازاي
لقيت اتوبيس سياحي وقف قصادي نزل منه السواق
بيطلب مساعدتي شرحت ليه الوضع
لقيته بيقولي طيب اقفلي عربيتك كويس وتعالي اركب معايا وهنتصرف لان وقفتك لوحدك في المكان ده غلط
اقتنعت بكلامه وركبت معاه الاتوبيس
قعدت في الكرسي الاخير في الجهه بتاعت السواق
والحقيقه كنت مرهق جدا من السفر فنمت غصب عني والساعه 8 مساءً لقيت الاتوبيس وقف فجأه
عند الكيلو 128 قلت جايز في عطل المهم مهتمتش بالموقف
لكن ابتديت اقلق واخاف
بعد ما سمعت اصوات خيول بتقرب من الاتوبيس
بصيت من الشباك لكن مفيش حاجه قلت جايز من الارهاق والتعب بيتهيألي لكن اللي حصل بعد كده كان غير متوقع لقيت الاتوبيس بيتهز وبيتمايل بقوه من جميع الاتجاهات
زعقت وناديت علي السواق لكن مكانش سامعني
والغريبه ان السياح قاعدين عادي جدا ومفيش منهم اي رد فعل خلال لحظات الاتوبيس كان مظلم تماما بعد ما الإضاءه اللي فيه اختفت وازاز الشبابيك اتكسر بالكامل
في اللحظه دي جسمي اتنفض بطريقه مرعبه كإن سلك كهربائي مسك فيا بقيت متكتف تماما بطريقه غير طبيعيه مش قادر اتحرك وعاجز عن الكلام من هول الموقف
لقيت باب الاتوبيس اتفتح واتقفل بقوه
وظهر فجأه قصادنا ظل اسود ضخم مش عارف اوصفه كويس من كثافه الشعر اللي مغطي جسمه
ابتدي يقرب من السياح ويقطع رؤوسهم
ضربات قلبي بقت سريعه وبوهم نفسي ان كل ده حلم كنت بموت من الخوف كنت حاسس اني هيغمي عليا
اقل من دقيقه كان جميع السياح اجساد علي الكراسي
رؤوس علي الارض ولم يتبقي سوي أنا
كنت عايز اصرخ بأعلي صوتي بعد شوفت رؤوس السياح اترفعت في الهوا وبتقرب مني
قومت من النوم مفزوع بسبب الكابوس اللي شوفته
بصيت حواليا كل حاجه طبيعيه قلت افتح الفيس شويه اضايقت لما قرأت خبر انفجار اتوبيس سياحي بالامس
بدأت اقلب في الصور كان عددهم 16 صورة
كل صورة بتفرج عليها بتثبتلي 100% إن الاتوبيس المتفحم هو نفس الاتوبيس اللي انا راكب فيه
مع ذلك حاولت اتجاهل كل ده وقلت يمكن شبه بعض مش اكتر لكن آخرصورة شوفتها حسيت بعدها بالرعب والخوف بعد ما عرفت ان سواق الاتوبيس السياحي المتفحم
هو نفس السواق اللي انا راكب معاه
انا مش عارف اعمل ايه انا خايف ان الحلم يتحقق
ومرعوب بعد ما شوفت الصور
- قولي اعمل ايه ياخالد ؟
= اهدي ياامير خير إن شاء اللّه مفيش حاجه
- خالد الحقني ارجوك الساعه دلوقتي 8 مساءً
الاتوبيس عطل حالا عند الكيلو 128
انا سامع اصوات خيول بتقرب من الاتوبيس و ...
- الو الو امير انت ياابني رد عليا
لـــ #أمير_جلال
#Horror_Stories_of_Amir_Galal
