لا تستعجلوا المصالحة، في العجلة الندامة:
منقولة عن صفحة الكاتب والاديب الاستاذ خالد جمعة*********************************ابن جيراننا واحنا زغار ـ تأليفة طبعاً ـ كان ميرضاش يتأجر عجلة من عند أبو مروان تيّم، ولما سألناه ليش، قال: أمي قالتلي في العجلة الندامة، وانا بديش أندم، كلنا كنا مفكرين واحنا زغار إنو العجلة تبعت أبو مروان هي اللي فيها الندامة، طلعت عجلة تانية لما كبرنا فهمناها، وبرضو ضلينا نعمل الأشياء ـ بعجلة ـ ومرات بنندم، ومرات بتزبط.بالنسبة للمصالحة، إنو 12 سنة هدول إحنا الشعب شايفينهم كتار، بس طبعا اذا بتفكرو بشكل فلسفي وتاريخي، شو يعني 12 سنة في التاريخ، ولا إلهن ذكر، ولا بيستاهلن ربع سطر في كتاب التاريخ، يعني بكرة بعد 300 سنة، حتمسك كتاب تاريخ وتقرا: وصار انقسام بين غزة والضفة امتد من سنة 2007 حتى عام 2107، وبيمشي التاريخ تيحكي عن إشي تاني، يعني مش مستاهلة القصة كل هالهوجة.على مهلكو يا جماعة، لازم الأمور تترتب بهدوء حتى ما نندم، لأنو العجلة طلعت مش تبعت أبو مروان تيم، يعني اقعدو هيك ـ هداكو الله ـ واشربو مي باردة لأنو الجو حر، وتناقشوا في الأمور نقطة نقطة، خدو وقتكو، وبعد ما تستوفو كل بنود النقطة، بتقلبو على النقطة اللي بعدها، إياكو تنقلو من نقطة لنقطة، من غير ما تكون النقطة الأولانية مخلصة، وبعد ما تخلصو كل النقط، إذا ما جبتولنا نقطة في هالأثناء، بتبلشو تناقشو في أهل غزة نفر نفر، شو كل واحد إلو وشو عليه، وانشالله قبل 2107 بتكونو خلصتو نقاشات، وساعتها بيقدرو أحفاد أحفادكو يوقعو على اتفاق المصالحة، بس أكيد هالتوقيع رح يصير في تشيلي على الأغلب، وفي بعض الروايات في سيبيريا، لأني بشك إنو يكون في فلسطيني واحد ضايل ساعتها، بشك أصلاً إنو يكون لفظ فلسطيني ضايل على الكرة الأرضية، حنصير زي حضارة المايا، والمايا هاي إحدى حضارات الهنود الحمر، مش المانجا اللي من غير خيوط، مهي اسمها مايا برضو، يمكن أياميها يكون في نوع افوكادو اسمو فلسطيني، يمكن.المهم، سيبوكو من الاستعجال اللي انتو فيه، الشعب بيتحمل، بس المهم ما تستعجلو عشان ما تغلطو، الشعب قادر يتحمل الكهربا 3 ساعات، حتى في ناس بتقول إنها مستعدة ترجع تطبخ عالحطب، بس مش لاقيين حطب، بعرف إنو أهل غزة بيتدلعو بس بدكو تتحملوهم، والناس كمان مستعدين يستغنو عن الغاز، وعن المي الحلوة، وعن أي إشي، مقابل إنكو ما تستعجلو، لأنو طلعت العجلة مش بس فيها ندامة، وطلعت ـ بشارة عليكو ـ من الشيطان كمان، وهدول اللي بينتحرو وبيحرقو حالهم وبيهاجرو، هدول مدلعين بدهم كل اشي عالجاهز وبسرعة، مش صابرين 50 أو 60 سنة، بيقولك الانقسام طول، يا عمي شوفو كوريا الجنوببة والشمالية كم سنة الهن؟ وشوفو اليمن الشمالي والجنوبي كم سنة قعد؟ وشوفو أم محمد قديش قعدت حردانة من جوزها، يعني عادي بس انتو اللي محروقة بصلتكو، وسيبوكو من اللي بيتفذلكو وبيقولو خير البر عاجله، هادي بس بتزبط في الجيزة، غير هيك إنسو.بس هو سؤال زغير محيرني من سنين: هي المصالحة عن جد في إيديكو؟
