قبل اسبوع .. بالتمام والكمال. راقتني هذه الصورة لولدي البكر كنعان.. لما تحمله في عيني من نباهة وجمال.. شوفو الله يحفظوو كيف منتبه للسيارات مليح.. ولا اجروو كيف لاففها قدامه لفة الغضنفر.. المهم دعيت الله يدير بالو على هالقاروط.. وما يحرمني منو ولا من ثقلة دموووو..
مبارح كعادتي نايم العصر نومه الي هيه.. وانتو بتعرفوني لمن انام بدي ونش يصحيني..والحمدلله إنو مرتي بتتفهم شو بتعني الي نومة بعد الغداء، ومن اول يوم تجوزنا فيه قلتلها انو انا اذا نمت اوعك تقولي متى بدك تصحى، بصحى لمن اصحى، وإوعك تصحيني من نومتي الا في حاله وحده وهي اذا انحرقت الدار، طبعا انا بتخوث عليها، لإنو اذا انحرقت الدار شو بدي اصحى اسوي اصلا؟؟ بظلني نايم ويمكن اصحى والا انا بحضن ابولهب.. المهم، كنت نايم وإذا بها مرتي فجأة بتخابط عباب غرفتي.. انا مش سامع لانو مضروب عذاني مثل الشباب تبعون الكهف.. بس هي دفشت الباب وهزتني بيدها بقوة.. وهي تعيط وتقولي قوم كنعان دعستوو سيارة..
شووووو..؟ بحلقت بعيوني.. مين كنعان..؟ قلتلها هيك والله.. بعرفش يمكن سؤال غبي لانو فش بالحارة واحد اسمو كنعان غير الي عنا.. بس لانو كنت قايم من نوم عميق .. وامام دموع زوجتي حسيت اني لازم اتفاعل بسرعة واسال اي سؤال.. لبين ما ارتب بمخي سؤال ثاني..وهاضا الي طلع معي هسع.
- وك يا زلمه قوم فز كنعان ابنا اندعس..
- ولكي شوووووو بتقولي..؟ مييين دعسووو..
- سيارة ماشية..
- شووووو.. ؟ ماشية؟
خذلك جوابها هي الثانية هاللاطة.. يعني شو بدو يكون دعسوو طيارة.. او سيارة واقفة..المهم..فزيت على حيلي بالكلسون.. طليت من الشباك واشوفلكم مجموعة نسوان الحارة متجمهرين عباب بيتنا.. نزلت اركض وهي لاحقتني بالبنطلون.. هي تشد وانا اشد.. المهم في وحده لبنانية جارتنا من بعيد مصفطى اديها فوق صدرها.. وشكلها كثير حزين تقول ابنها الي مخبوط..انتبهت اني بالشارع بيناتهن بالكلسون.. سالتني مرتي وين رايح؟.. قلتلها بدي اشوف الحادث والولد.. قالتلي فوت فوت جاي.. الولد هيو جوا بالصالون قاعد..
رجعتلكو على مضض..كنت حاب اتجمهر مع المتجمهرين.. ويبدو يواسوني ويبوسوني ويقولولي.. طول بالك ياجار.. ما تشوف شر يا جار..قلبنا معك يا جار.. الي هووو.. رجعت.. سالتوو ولك شو مالك.. ليش ايدك هيك بتطوطح عجنبك.. اجهش بالبكاء.. وقال لي دعستني السيارة.. سوده كبيرة.. قلتلو ولك كيف دعستك..قالي هيك... واشار بايدو في حركة سريعة خاطفه من حركاتو اللطيفة تقول بطير بطيارة.. راحت اصابع ايدو ما تخوش بعيني.. طيب يابا، إهدى و ان شالله خير..زميتو بهالسيارة وعالمستشفى..واتصلت بالشرطة يلاقوني بالطوارئ..استغليت الطريق افهم من هالملعون كيف لخمتو السيارة..
قال : " كنت راكب البسكليت وهو طلع فوق البسكليت وطلع فوق ايدي..ووقف ونزل وقالي قوم عمو فش فيك اشي روح على داركوو.."
طيب يابا بسيطة .. وبلا كذب ايدك لو طلعت عليها السيارة كانت مهروسه مثل حبة القطايف البايتة..فجأة انتبهت لموضوع البسكليت.. وغادرني مزاجي المرح.. فقد ترقيت قبل ايام في عملي الى درجة مستشار اكبر واوحد... وقبضت مبلغا مجزيا من المال ورحت بلحظة انشراح مشتري بسكليتين جداد و فخيمات كل واحد ب 300 دينار.. اه والله كاش مش اقساط..
ولك و وين البسكليت راح.. قالي انطعج.. قلت في قلبي الله يطعج راسك.. المهم خلونا في الولد..طلع معو كسر... واعطو اجازة عن المدرسة.. اجت الشرطة وفتحت محضر..وبخلال ساعة كنت محسوبكم جايب هوية السائق..بامور التحري والكاميرات الامنية ذيبكو... من زعلي على البسكليت والولد طبعا.. حلفت يمين قاطع مانع لمن عرفت انو السايق هندي وبسوق مع احدى العوايل بالحارة.. الا اخليه يدود بالحبس..وصلت البيت انا والولد.. والا بسيارة كاديلاد موديل 2016 واقفه عباب دارنا.. وطلت منها سيدة جميلة لبنانية على فلسطينية.. وبتقلي الف سلامه ابوكنعان على ابنك كنعان..كلمة ابوكنعان طالعه من ثمها مثل العسل..اول مره بحس بالابوة واهمية ابني كنعان..قالتلي احنا كثير اسفين عالي صار معك.. هذا السايق الهندي الي عنا اجو الشرطة واخذوه.. وانا زوجي مسافر وماعندي حد غير الله و السايق...
عرفت من الحكي معها انهم جماعة مليونيرية.. قالتلي اي شي علاج وغيرو علينا.. قلتلها اعوذ بالله هاضا كنعان بالذات اغلا ولد عندي.... قلت يا ولد اخزي الشيطان والنبي وصى عسابع جار..وتنازلت عن حقي.. املا في ان يعوضني ربي بشغلة عملة..من هون او هون..
طبعا رب ضارة نافعة..فانا كقاص شعرت مؤخرا بالحزن وان الالهام تخلى عني، اذ لم اعد اجد بسهولة موضوعات اكتب عنها.. فجاءت هذه سانحة طيبة وكنت فعلا اشعر بالكئابة والعزلة.. هسع كل ساعة ساعتين زمان بيرن تلفوني..بلقى جارتنا بتسألني.. اه كيفك يا جار طمنا عن كنعان و ابوكنعان...قرايبي واصدقائي كلهم صارو يتصلولي، بس المشكلة انا ما عنديش أسلوب احاور الناس فيه بذكاء ولطف، عشان هيك بحكو معي مره وبعاودوش الاتصال الا في مصيبة أخرى، مثلا اتصل بي خالي العجوز العصبي والمتدين جدا....
_الو ..السلام عليكم.. شو صاير عندكو؟
- اهلين يا خالي.. والله خير.. اشتريت بسكليت جديد للولد.. وخبطتو سيارة..
_ طيب وكيف وضعو؟
_ انطعج شوي..وفي كسر بالقادون..
_ ولك اي قادون يا ملعون عرضك ..انا بسألك عن الولد..
_ اه.. مليح يا خالي الله يسلمك.. هيو بيدحل قدامي دحل..
_ طيب حاول تجيب قفل وتربطوو...
_ البسكليت ولا الولد يا خالي..؟
طوووووط.. سكر الخط بوجهي...
#رب_ضارة_نافعة_شاهين_طراوة